首頁 > 藝文創作 > 圖文影像創作 > 【台美人小說】請食晝⊙胡民祥
個人訂閱  |   停止訂閱  |   功能說明
本版規則:
‧本版以發表個人原創圖片作品為主,文字創作請至文創空間發表
‧圖文創作、電腦繪圖、插畫、影像合成等圖片創作作品歡迎發表~
‧轉貼圖片請在盡量於發表時加上您對轉貼作品的看法或心得。

[圖文創作]【台美人小說】請食晝⊙胡民祥

wagi-sun (ekanglang)
積分 : 118
回應數:0 / 瀏覽數:523
2015-05-07 17:30:34 發表
1

  想起當年,1967年,唯美麗島來夠幅員遼闊的北美洲,一切攏生分,新奇;佇小鎮,墓仔埔嘛敢去,佇遐,散步,喫蘋果,看風景。

  民間傳說撥土鼠若佇二月初二透早無看著家己的影,春天提早來,若有,道愛佫等六禮拜。四十年一目聶,時序來夠2008年二月初二,嶺谷鄉(Delmont)東北爿五十英里的芳沙桶尼鄉的菲呂(Punxsutawney Phil)撥土鼠宣告:今年春天會提早夠。

  許青峯滯佇賓夕凡尼亞州西爿的嶺谷鄉強欲有三十年,聽著春天早夠,誠歡喜。

  四十年前的八月底,許青峯來夠「呂意士堡:Lewisburg」,一個賓夕凡尼亞州中部的小鎮,鎮裡有15號公路南北貫通,南可直通賓州首都哈里士堡,北至紐約州西南邊界,鎮北八英里有一條東西向的州際80號高速公路,「趖士奎哈那:Susquehanna」河佇鎮東流過,鎮裡有一間「巴克乃呂大學:Bucknell University」偎佇河邊,鎮民參大學生人數平平,攏各有五千。許青峯單操一個來自太平洋西緣的美麗島,島上四季如夏,攏是熱天的延長。遮,北國河邊小鎮秋楓紅葉燒滿天,落葉舞滿地,樹禿頭枝光身,這款秋景亦美麗亦蕭殺。

  秋盡風雪來,光身禿枝樹換上新娘紗,佫是另款的雪白天地,嘛是唔捌經驗過的。參南爿菲律賓姑娘Aurora,相招去踏雪,坐餐廳餐盤,滑落山谷,踏過鐵枝路,夠河邊觀河墘結冰。一陣外國留學生,定定絞群聚伴話仙唱歌,親像青峯敎唱〈望春風〉,印度孟加里美男子Oarun用孟加里語唸泰高奧詩歌,日本姑娘小泉綠敎唱〈ここに幸あり;幸福佇遮〉,滿滿友情渡過寒咻咻的冬天。

  春天唯地面鑽出來。

  三月初,佇猶死死抛荒的大地,針針的、青綠青綠的水仙鑽地來,短短青青遮呢仔奇妙的新生命。無張持,來一陣雪,將猶未一寸懸的水仙芛坎起來。青峯想,水仙無脈啦。二三日後,雪溶去,並無凍死,猶是一身青綠,繼續抽身長,無驚無惶,生命誠是韌,互伊想起故鄉南國的蕃薯葉,冬尾時仔若凍霜臭火焦去,隨佫吐新芛,共款韌命敖生湠。

  三月尾四月初,呂意士堡家家戶戶埕裡差不多攏有水仙。葉甲那劍,花梗一枝抽懸來,梗頂彎身九十度。正面看去,周邊有花瓣六片現開來,那仙子戴帽,中央有一枝喇叭花圈,圈心一絲尖珠蕊,側身看來那姑娘舉一支遮陽傘,黃花清芳溫暖那日光,佇劍葉海裡,早春窈窕仙子一身一身迎風抌頭。

  四月上旬,佇校園裡偎文學院的壁邊,一排長長長的櫻花樹一時全開,一大遍白白白的花海,有冬天雪彼款潔白之美,佫有雪所無的溫暖之感,佫有雪所無的重生之喜,啊!青峯一時体會著,冬去春來矣!

  再來,四月中旬,人家厝埕籬笆滿身黃花染枝條,青峯問人,知影是一款開花的灌木,叫作連翹(Forsythia),先開花慢發葉,怹正式宣告冬天退位。嘛是四月中,青峯佇鎮裡郵局停車場看著大蕊木蘭花,白裡帶淡紫有芳味。花謝後才有新芛抽葉。紲咧四月尾,青峯注意著校園裡,有觀賞的蘋果樹花、李仔花。紫丁香五月初母親節裡來報到,偎佇大學校園圖書館前,花開甲綿綿那香檳會起泡,芳芳芳會揪人。五月中有杜鵑花吐紅抑是展白,猶有紅牡丹展富貴專揣風流人物,五月尾有芍葯草本花純白抑是深紅大眾情人,六月有虎百合展長腳姑娘撐金針花,怹將春天抹甲花海繽紛,蜜蜂迎迎舞,蜂鳥嘛來插一腳,蝴蝶亦現身,共同譜一幅大地回春的眾生油畫。

  春天回魂,包括樹枝吐芛,穩穩仔宓佇枝頭,那有佫那無咧,目尖才看會著,一二日無注意,怹道發甲滿枝頭有一二寸長,齊聲喝:春天,阮來啦!李仔樹佇一陣一陣的風裡,白花湧浮游佇新芛青淡綠海上。四月中,青楓亦無輸人,莩花莓發芽,滿樹花籽,花籽一對八字型有翼。籽熟隨風飛那螺旋槳,那直升機滿天飛舞,飄離母樹遠遠的所在,降落新地生湠。

  三個月的寒天冷凍,春回大地,草木吐蕊,無樹不開花,日日天天佇每角落展開來;這一年春天花新樹芛的震撼,清新溫暖重生的感受,烙印佇青峯心肝芛仔裡。

  春天來,1968年六月初八,許青峯帶著滿滿春天記持,亦帶著一張碩士學位證書,歡歡喜喜離開滯九個月的呂意士堡,坐上灰狗巴士,沿著15號公路往北,行過賓州的莊腳,一路春花滿天地,進入紐約州,嘛是共款,終點是伊里湖邊的紐約州第二大城水牛城,佇州立水牛城大學攻博士。

  五年後提著學位,落南去核羅里達的天霸市,向西屋公司報到,開始工程生涯。天霸市氣候那像南國美麗島,一年攏是熱天的延長。春天的感受漸漸失傳。

  後來,公司調伊回水牛城有六年,紲咧,1982年調來賓州西爿的嶺谷鄉。

  佇西屋公司食頭路,強欲有三十冬,無閒,有時嘛將春天的來臨,煞放未記持去。

  這年,2008,撥土鼠宣告春天早來,青峯的春天一時回魂來。

  三月廿早起,佇停車場,欲行往辦公室,拄好看著秘書古羅里亞(Gloria)。青峯誠愛古羅里亞的親和力,有她佇咧,辦公室天天是春天,日日有笑聲。古羅里亞唯車底搬出大包小包,青峯緊過去湊腳手,幫她捾一寡。

  「遮攏是啥啊?」青峯問。

  「噢,是杯仔糕,今仔日是Peter的生日,千萬唔通講。」古羅里亞意思欲互Peter驚喜一下。

  「是是,未講。」青峯記起舊年九月,古羅里亞安排雞卵糕祝賀伊青峯生日的場面。

  佇青峯的記持裡,事實上,嘛是組裡人人攏同意的,古羅里亞好比是一位辦公室媽媽咧。古羅里亞的辦公桌可講是八寶箱。同事感冒,她有阿斯比靈,你若欠郵票,揣她穩有,當然,糖柑仔桌上不時滿滿。你人若忝,嘛可以揣她話仙幾分鐘仔。有一擺,青峯行過她辦公桌仔,看著古羅里亞用酒精咧拭Judy的手指頭,然後抹葯膏,紲咧,用OK紡包起來,未輸護士咧。

  青峯組裡,有一位工程師Jimmy Johnson,伊年年熱天去登山健行,伊是去爬美國東部的Appalachian Trail,唯喬治亞州一直延伸至勉因州,長長有二千二百英里,伊每年去行二、三百英里。青峯參伊誠有話講,參伊講起春天的震撼,伊向青峯講,登山步行,遠離塵世俗事,有共款的震撼力,值得試。

  三月廿是春分,春天誠實來夠。一禮拜後,賓西脈地順地區晴空萬里。中晝時,青峯參岑彌(Jimmy)佇公司餐廳食晝,順紲來買水仙花,美國癌症協會怹年年攏佇這陣賣水仙花募款。看著水仙花,青峯想起兩個查某囝的外公,台灣桃仔城的內科醫師,一支聽診筒勾入耳,另外一爿喇叭嘴那水仙伸向患者胸坎,一身那水仙抌頭迎患者。外公水仙醫年年春天攏會來嶺谷鄉探親,參孫女共享埕裡的水仙美姿。佇懷思的情境裡,傳來聲語。

  「秘書古羅里亞送一張電子批,通知四月初四全組欲食晝。」岑彌提起。

  「是,有看著。」青峯語氣平淡。

  「嘛拘,無說明是啥理由,欲食晝。」岑彌指出。

  「有影咧。」青峯語氣猶是平平仔。

  「有問秘書古羅里亞,她唔肯講。」岑彌佫講。

  「請晝,好代誌。」青峯輕淡講。

  「是啊,逼她,她煞笑笑按呢講:『律師叫我封嘴!』。」岑彌指出。

  「噢?遮嚴重!」青峯聲調那像有一屑仔古怪。

  食過晝,兩人各人回辦公室,無閒空課。

  隔日,共組的同事,議論紛紛,攏是咧談請食晝的代誌。有人猜是經理欲請的,因為組裡舊年業績誠懸,所致,經理為著按呢,欲參逐家慶祝一下。唔拘,經理拄好出國,去歐洲出差,無法度證實業績好的講法。

  有一位退休的,佫轉來公司作,伊無屬於任何組,特別去向秘書講,伊嘛應該算是組裡的。反正有免費的中晝頓,誰唔食?古羅里亞互伊講甲無辦法,道算伊一份。人數按呢唯廿位增加夠廿一位。

  秘書特別提起,食晝佫有啉葡萄酒。若按呢,一客算廿箍,加上小費,請落來,嘛愛有欲五百箍,用公費當然無算啥,但是,若對個人來講,是一筆大數目呢!

  紲咧,有人擋未牢,寫一張電子批,互去歐洲出差的經理。

  經理回批:「秘書是咱組的真正老闆,恁著愛親身問她,她啥物攏知,問她,卡未重誕!」

  猶是不得知。

  有人臆是:「定著是有人著威力彩券,歡喜,欲參逐家分享一下。」

  嘛有人猜是:「定著有人老來生獨囝,樂暢,欲慶祝一下。」

  不管怎款,反正,人人有免費中晝頓,人人期待。唔拘,美國商業文化有一句名言:「天底下無白食的中晝飯。」

  煞有人講:「敢會時夠,咱家己著出錢咧?」

  有人回話:「相信古羅里亞未作這款代誌!」

  不而過,另外一人無頭無尾鬧兩字:「誰知?」

  有人唔死心,一日夠暗纒著古羅里亞,問,佫問,再問。古羅里亞猶是彼句話:「律師叫我封嘴!」

  不得要領,組裡開始有人發起,美國人誠愛的活動,簽繳;每人出五箍,將各人的名參所臆的寫佇紙條裡,揉揉咧,參五箍銀作伙交互秘書,誰臆著,所有的錢攏歸伊收,若是有人臆共款,照比例分。若是無人臆著,所有的錢送互本鎮脈地順的老人中心。秘書未使參加以外,總共有20人,總額一百箍銀。

  人人攏咧猜測,人人攏咧數想彼一百箍銀,人人攏咧等待無料的中晝頓。

  一日一日過,天氣愈來愈燒烙起來,水仙花已經四界開。有一款柳枝無輸水仙花,枝頭莩出白白毛毛的花莓,早春溫度回升,怹花枝招展報春來。雪滴(Snowdrop)嘛無認輸,姿勢徛栽栽,她咧跳花舞。春天愈來愈奢揚。

  請晝的日子總算來夠,全組的同事佇十一點半,陸陸續續來夠公司附近的新士坦頓莊,這是州際高速公路76參70交滙的一個莊頭,往西北走76號公路十統英里可夠匹茲堡,往東走76號公路280英里夠費城,往西走70號公路可去烏海烏州的首府哥倫巴士。遮新士坦頓,有一間義大利餐廳La Tavola Ristorante,不止仔有名。

  佇餐廳的停車場,鬱金香破土來,早春的冷風中,花蕊那像一杯一杯白酒紅酒,冰清冷冽中釋放著溫暖的光彩。佇餐廳的紅磚壁邊,有兩欉木蘭花開出滿樹純白的花海,一蕊一蕊那甜點乳酪糕,花酒及甜點親像特別咧迎接來赴食晝的同事。全部廿一人坐成四桌,青峯、岑彌及古羅里亞坐共桌。菜色有三款,岑彌愛爾蘭裔,恰意小牛肉質軟Q,芷幼多汁,叫一客馬鈴薯小牛排。古羅里亞是義大利裔,祖先來自文藝復興的府城核羅倫斯,誠自然愛著核羅倫斯料理,特別她是咯咯叫的雞,所致,叫一客菠稜仔菜核羅倫斯雞。青峯來自海島,當然習慣食魚,另外,誠興義大利麵食料理,叫一客義大利海鮮麵。青峯點白葡萄酒,岑彌及古羅里亞是紅的。每桌人人話仙,講笑話,用餐夠欲十二點半,差不多正餐食完程度,甜點猶未上桌。古羅里亞叫餐廳服務生替每人斟酒,紲落,她將字條一張一張展開來,叫岑彌及青峯過目統計。

  「多謝恁逐家來中晝聚餐,到底誰請的,咱誠緊道會知影。」古羅里亞徛起來講。

  「代先,請岑彌向咱報告,逐家的猜測結果。」古羅里亞請岑彌接過去。

  「咱攏總有廿一位受請來夠遮,古羅里亞她知誰人請的,所以她當然無臆。」岑彌紲咧宣報結果。

  「經理欲慶祝舊年好業績,總共九票。」岑彌宣告,紲咧問經理:「敢是事實?」

  「咱舊年有影業績誠好。」經理Bob講:「唔拘,歹勢,這擺是別人請的,咱等後月日。」逐家拍噗仔,有影一頓招一頓。

  「古羅里亞著威力彩券欲慶祝,有四票。」岑彌宣告,紲咧問古羅里亞。

  「可惜,唔是。將來若有著,當然嘛請恁逐家一頓腥臊的。」古羅里亞笑諧諧。

  「有人牽手有身欲慶祝,有二票。」岑彌宣告,紲咧問:「敢有人認定這個?」

  「阮牽手有身三個月。」同事Tony徛起來講:「唔拘,歹勢,這頓是別人請的,等生了,一定請逐家食甜,若是查甫的,加送一支雪茄。」

  「有人減体重成功欲慶祝,嘛有二票。」岑彌宣告,紲咧問:「Dick你最近体重減五十磅,敢是你?」

  「唔敢請。」Dick半耍笑講:「請了,興食,佫大箍起來,著慘!」

  「有人定婚欲慶祝,有二票。」岑彌宣告,紲咧問:「Judy敢是妳?」

  「恁奈知影?」Judy歹勢歹勢講:「Tom佇三日前求婚爾爾。」

  「恭喜!恭喜!」古羅里亞講:「明仔晝,咱食櫻桃糕,替Judy慶祝一下。」

  「另外一票是空白字條。所以,猶無答案。即馬,請古羅里亞宣布請晝的原由。」岑彌講了,坐落來。

  「既然猜測攏唔著,一百箍銀道捐去老人中心。事前,誠濟人咧問,是誰欲請的,我攏講:『律師叫我封嘴。』即馬,請律師作說明。」古羅里亞手指青峯。

  青峯作一段短短的說明,如下:

 

一禮拜前,拜三,佇停車場,看著古羅里亞滿面春風,親像今年的春天,一蕊迎人的水仙花,互人一款溫暖的氣氛。想起,40年前,1968年的春天,佇這塊美麗國度初次感受著,春天回魂,對一個來自亞熱帶的人,是一款震撼。最近,拄領著一筆加班費,想著欲參恁分享今年的春天魂,佫卡重要的是:那春天的古羅里亞,是咱組裡天天的春天花蕊,她是咱組裡貼心的辦公室媽媽。

 

講煞,青峯請逐家將葡萄酒提起來。

  「咱逐家感謝古羅里亞,啉一杯。」古羅里亞表情甜甜笑迷迷,嘛拘,歡喜中帶一款互人作弄的表情,舉手輕拍青峯。

  「感謝恁逐家來分享春天的來夠,再啉一杯。」青峯再次敬眾人一杯。

  「原來是你!恬恬無動無靜,一盤棋,行甲遮厲害;軍著皇后:古羅里亞,亦電著眾兵卒,佩服!佩服!」岑彌驚奇滿滿。

  岑彌點醒眾人的心緒,噗仔聲嗶嗶噗噗拍破開來;古羅里亞將青峯嘴皮深深唚落去,噗一聲,青峯滿面飛春風。

 

──2013.4.25寫佇茉里鄉
  2013.8.5《台江台語文學》第七期

《相思蟬》書名頁.jpg






回個人新聞台看更多好文
共1頁
1
瀏覽方式:
上一個話題 下一個話題 友善列印轉寄 字級 :